ಪುಟ್‌ಪಾತ್ ಮೇಲೆ ಪ್ರವಾಸಿಗರ ವಾಹನ ಪಾರ್ಕಿಂಗ್: ಪೊಲೀಸರ ತಕ್ಷಣದ ದಂಡ ಕ್ರಮ

ಕಳಸ ಲೈವ್ ವರದಿ
ಕಳಸ ಪಟ್ಟಣದ ಮುಖ್ಯ ರಸ್ತೆಯಲ್ಲಿ ಪುಟ್‌ಪಾತ್ ಮೇಲೆ ರಾಂಗ್ ಸೈಡ್‌ನಲ್ಲಿ ವಾಹನ ನಿಲ್ಲಿಸಿದ್ದ ಪ್ರವಾಸಿಗರು, ಅದನ್ನು ಪ್ರಶ್ನಿಸಿದ ಸ್ಥಳೀಯರೊಂದಿಗೆ ವಾಗ್ವಾದಕ್ಕೆ ಇಳಿದು ದಂಡ ಕಟ್ಟಿದ ಘಟನೆ ನಡೆದಿದೆ.
ಥಾರ್ ಜೀಪ್‌ನಲ್ಲಿ ಕಳಸಕ್ಕೆ ಆಗಮಿಸಿದ ಪ್ರವಾಸಿಗರ ಗುಂಪೊAದು ತಮ್ಮ ಎರಡು ಜೀಪ್‌ಗಳನ್ನು ಕಳಸ ಮುಖ್ಯ ರಸ್ತೆಯ ‘ನೋ ಪಾರ್ಕಿಂಗ್’ ವಲಯದ ಪುಟ್‌ಪಾತ್ ಮೇಲೆ ನಿಲ್ಲಿಸಿದ್ದರು. ಇದು ಪಾದಚಾರಿಗಳು ಮತ್ತು ಸಂಚಾರಕ್ಕೆ ಅಡಚಣೆ ಉಂಟುಮಾಡುತ್ತಿತ್ತು.
ಪರಿಸ್ಥಿತಿಯನ್ನು ಗಮನಿಸಿದ ಸ್ಥಳೀಯ ನಿವಾಸಿಗಳು ವಾಹನ ಸವಾರರನ್ನು ಸಂಪರ್ಕಿಸಿ, “ಪುಟ್‌ಪಾತ್ ಪಾದಚಾರಿಗಳ ಓಡಾಟಕ್ಕೆ ಮೀಸಲಾಗಿದೆ ಮತ್ತು ಇದು ರಾಂಗ್ ಸೈಡ್ ಪಾರ್ಕಿಂಗ್ ಆಗಿದೆ. ಕೂಡಲೇ ವಾಹನವನ್ನು ಬೇರೆಡೆ ನಿಲ್ಲಿಸಿ,” ಎಂದು ವಿನಂತಿಸಿದ್ದಾರೆ.
ಆದರೆ ಸ್ಥಳೀಯರ ಮಾತುಗಳನ್ನು ಕ್ಯಾರೇ ಎನ್ನದ ಪ್ರವಾಸಿಗರು, ನಾವು ಆಡಿದ್ದೇ ಆಟ ಎಂದು ವರ್ತಿಸಿದ್ದಾರೆ. ಕೂಡಲೇ ಪೊಲೀಸರು ಬಂದು ಜೀಪ್ ಟೈರ್‌ಗೆ ಲಾಕ್ ಹಾಕಿದ್ದಾರೆ. ಸ್ಥಳೀಯರು ಈ ಸಂದರ್ಭದಲ್ಲಿ ಪ್ರವಾಸಿಗರನ್ನು ಪ್ರಶ್ನಿಸಿದ್ದಾರೆ. ಆದರೆ ಪ್ರವಾಸಿಗರು ತಮ್ಮ ತಪ್ಪನ್ನು ಒಪ್ಪಿಕೊಳ್ಳುವ ಬದಲು ಸ್ಥಳೀಯರ ಮೇಲೆ ಗದರಿದ್ದಾರೆ. “ತಪ್ಪನ್ನು ತಿದ್ದಿಕೊಳ್ಳುವ ಬದಲು, ಪ್ರವಾಸಿಗರು ಉದ್ಧಟತನದಿಂದ ವರ್ತಿಸಿ, ಸ್ಥಳೀಯರೊಂದಿಗೆ ವಾಗ್ವಾದಕ್ಕೆ ಇಳಿದಿದ್ದಾರೆ.
ಸ್ಥಳಕ್ಕೆ ಬಂದ ಪೊಲೀಸರು ಸಂಚಾರ ನಿಯಮಗಳನ್ನು ಸ್ಪಷ್ಟಪಡಿಸಿ ನಿಯಮ ಉಲ್ಲಂಘಿಸಿ ಪುಟ್‌ಪಾತ್ ಮೇಲೆ ರಾಂಗ್ ಸೈಡ್ ಪಾರ್ಕಿಂಗ್ ಮಾಡಿದ್ದಕ್ಕಾಗಿ ಪ್ರವಾಸಿಗರಿಗೆ ದಂಡ ವಿಧಿಸಿದರು ಮತ್ತು ವಾಹನವನ್ನು ತಕ್ಷಣ ಸ್ಥಳದಿಂದ ತೆರವುಗೊಳಿಸಿದರು.
ಈ ಘಟನೆಯು ಪ್ರವಾಸಿ ತಾಣಗಳಲ್ಲಿ ಸಂಚಾರ ನಿಯಮಗಳನ್ನು ಮತ್ತು ಸ್ಥಳೀಯರಿಗೆ ಗೌರವ ನೀಡುವ ಅಗತ್ಯತೆಯನ್ನು ಎತ್ತಿ ಹಿಡಿದಿದೆ. ನಿಯಮ ಉಲ್ಲಂಘಿಸುವ ಪ್ರವಾಸಿಗರು ಸ್ಥಳೀಯರಿಗೆ ತೊಂದರೆ ಕೊಡುತ್ತಿರುವುದು ಇದೇ ಮೊದಲಲ್ಲ. ಸ್ಥಳೀಯರ ಮಾತನ್ನು ಕೇಳದೆ ಉದ್ಧಟನ ತೋರಿಸಿದ ಪ್ರವಾಸಿಗರಿಗೆ ಪೊಲೀಸರು ಸರಿಯಾದ ಕ್ರಮವನ್ನು ತೆಗೆದುಕೊಂಡಿದ್ದಾರೆ. ಪೊಲೀಸರ ದಿಟ್ಟ ಕ್ರಮವನ್ನು ಸಾರ್ವಜನಿಕರು ಪ್ರಶಂಸಿಸಿದ್ದಾರೆ.