ಪೋಷಕರೇ ಗಮನಿಸಿ! ಗುಣಮಟ್ಟದ ಶಿಕ್ಷಣಕ್ಕೆ ಈಗ ಕಳಸ ಸರ್ಕಾರಿ ಪದವಿ ಪೂರ್ವ ಕಾಲೇಜು ಉತ್ತಮ ಆಯ್ಕೆ

ಕಳಸ ಲೈವ್ ವರದಿ

(ಸುದೀಶ್ ಸುವರ್ಣ ಕಳಸ)
ಇಂದು ಶಿಕ್ಷಣ ಎಂಬುದು ವ್ಯಾಪಾರೀಕರಣಗೊಳ್ಳುತ್ತಿರುವ ಕಾಲಘಟ್ಟದಲ್ಲಿ, ಬಡ ಮತ್ತು ಮಧ್ಯಮ ವರ್ಗದ ಪೋಷಕರು ತಮ್ಮ ಮಕ್ಕಳ ಉನ್ನತ ಶಿಕ್ಷಣಕ್ಕಾಗಿ ಲಕ್ಷಾಂತರ ರೂಪಾಯಿ ಸುರಿದು ನಗರ ಪ್ರದೇಶದ ಖಾಸಗಿ ಕಾಲೇಜುಗಳತ್ತ ಮುಖ ಮಾಡುತ್ತಿದ್ದಾರೆ. ಆದರೆ, ನಮ್ಮ ಕಳಸದ “ಸರ್ಕಾರಿ ಪದವಿ ಪೂರ್ವ ಕಾಲೇಜು” ಯಾವುದೇ ಖಾಸಗಿ ಕಾಲೇಜಿಗೂ ಕಡಿಮೆ ಇಲ್ಲದಂತೆ ಅತ್ಯಾಧುನಿಕ ಸೌಲಭ್ಯಗಳು ಮತ್ತು ಗುಣಮಟ್ಟದ ಶಿಕ್ಷಣವನ್ನು ನೀಡುವ ಮೂಲಕ ಹೊಸ ಭಾಷ್ಯ ಬರೆಯುತ್ತಿದೆ.
ದಾಖಲೆ ಬರೆದ 99% ಫಲಿತಾಂಶ
ಈ ಬಾರಿ ದ್ವಿತೀಯ ಪಿಯುಸಿ ಫಲಿತಾಂಶದಲ್ಲಿ ಶೇ. 99ರಷ್ಟು ಸಾಧನೆ ಮಾಡುವ ಮೂಲಕ ಕಾಲೇಜು ತನ್ನ ಶೈಕ್ಷಣಿಕ ಗುಣಮಟ್ಟವನ್ನು ಸಾಬೀತುಪಡಿಸಿದೆ. ಕೇವಲ ಅಂಕಗಳಿಕೆಯಲ್ಲದೆ, ವಿದ್ಯಾರ್ಥಿಗಳ ಸರ್ವಾಂಗೀಣ ಅಭಿವೃದ್ಧಿಗೆ ಇಲ್ಲಿನ ಶಿಕ್ಷಕ ವೃಂದ ಪಣತೊಟ್ಟಿದೆ.
ಖಾಸಗಿ ಕಾಲೇಜುಗಳನ್ನು ಮೀರಿಸುವ ಸೌಲಭ್ಯಗಳು:

ಅತ್ಯಾಧುನಿಕ ಸ್ಮಾರ್ಟ್ ಕ್ಲಾಸ್: ತಾಂತ್ರಿಕತೆಯ ಸದ್ಬಳಕೆಯೊಂದಿಗೆ ಮಕ್ಕಳಿಗೆ ಪಾಠ ಪ್ರವಚನಗಳನ್ನು ಮನವರಿಕೆ ಮಾಡಿಕೊಡಲಾಗುತ್ತಿದೆ.
ಸುಸಜ್ಜಿತ ಪ್ರಯೋಗಾಲಯ: ವಿಜ್ಞಾನ ವಿಭಾಗದ ವಿದ್ಯಾರ್ಥಿಗಳಿಗೆ ಪ್ರಾಯೋಗಿಕ ಜ್ಞಾನ ನೀಡಲು ಅತ್ಯುತ್ತಮ ಲ್ಯಾಬ್ ಸೌಲಭ್ಯವಿದೆ.
ಸಿಇಟಿ ಕೋಚಿಂಗ್: ಗ್ರಾಮೀಣ ಭಾಗದ ವಿದ್ಯಾರ್ಥಿಗಳು ವೃತ್ತಿಪರ ಕೋರ್ಸ್ಗಳಿಗೆ ಆಯ್ಕೆಯಾಗಲು ಕಾಲೇಜಿನಲ್ಲೇ ವಿಶೇಷ ತರಬೇತಿ ನೀಡಲಾಗುತ್ತಿದೆ.
ಉಚಿತ ಊಟದ ವ್ಯವಸ್ಥೆ: ಹೊರನಾಡಿನ ವತಿಯಿಂದ ವಿದ್ಯಾರ್ಥಿಗಳಿಗೆ ಪ್ರತಿದಿನ ಉಚಿತವಾಗಿ ಪೌಷ್ಟಿಕ ಊಟದ ವ್ಯವಸ್ಥೆ ಇರುವುದು ಈ ಕಾಲೇಜಿನ ಹೆಗ್ಗಳಿಕೆ.
ಪಠ್ಯೇತರ ಚಟುವಟಿಕೆ: ಕ್ರೀಡೆ ಮತ್ತು ಸಾಂಸ್ಕೃತಿಕ ಕ್ಷೇತ್ರಗಳಲ್ಲಿಯೂ ವಿದ್ಯಾರ್ಥಿಗಳಿಗೆ ಪ್ರೋತ್ಸಾಹ ನೀಡಲಾಗುತ್ತಿದ್ದು, ಸುಸಜ್ಜಿತ ಕಟ್ಟಡವು ಕಲಿಕೆಗೆ ಪೂರಕವಾದ ವಾತಾವರಣ ನಿರ್ಮಿಸಿದೆ.
ಮಹಮ್ಮದ್ ರಫೀಕ್ ಎಸ್‌ಡಿಎಂಸಿ ಕಾರ್ಯಆಧ್ಯಕ್ಷರು,:  “ನಮ್ಮ ಭಾಗದ ಪೋಷಕರು ದುಬಾರಿ ಹಣ ನೀಡಿ ಹೊರಗಿನ ಕಾಲೇಜುಗಳಿಗೆ ಮಕ್ಕಳನ್ನು ಕಳುಹಿಸುವ ಅಗತ್ಯವಿಲ್ಲ. ನಮ್ಮ ಸರ್ಕಾರಿ ಕಾಲೇಜಿನಲ್ಲಿ ನುರಿತ ಶಿಕ್ಷಕರು ಮತ್ತು ಅತ್ಯುತ್ತಮ ಮೂಲಸೌಕರ್ಯಗಳಿವೆ. ಈ ಬಾರಿಯ 99% ಫಲಿತಾಂಶವೇ ಇದಕ್ಕೆ ಸಾಕ್ಷಿ. ಪೋಷಕರು ಕಾಲೇಜಿನ ಮೇಲೆ ನಂಬಿಕೆ ಇಟ್ಟು ಮಕ್ಕಳನ್ನು ಇಲ್ಲಿಗೆ ದಾಖಲಿಸಿ, ಅವರ ಭವಿಷ್ಯ ರೂಪಿಸಿ”
ಮಧುರ ಬಿ.ಪಿ(97%) ಅಂಕ ತೆಗೆದ ವಿದ್ಯಾರ್ಥಿನಿ
ಕಲಿಕೆಗೆ ಅಲ್ಲಿಯ ಶಿಕ್ಷಣ ಮತ್ತು ಅಲ್ಲಿ ಉಪನ್ಯಾಸಕರು ಮುಖ್ಯವಾಗಿರುತ್ತಾರೆ.ಬಹುಶಃ ನಾನು ದುಬಾರಿ ಡೊನೇಷನ್ ಕೊಟ್ಟು ಖಾಸಾಗಿ ಶಾಲೆಗೆ ಸೇರಿದಿದ್ದರೆ ಇಷ್ಟು ಅಂಕ ಖಂಡಿತ ಸಿಗುತ್ತಿರಲಿಲ್ಲ.ಕಳಸ ಸರ್ಕಾರಿ ಕಾಲೇಜಿನ ಉಪನ್ಯಾಸಕರು ಕೊಡುವ ಶಿಕ್ಷಣ ಇಲ್ಲಿಯ ವ್ಯವಸ್ಥೆ ಯಾವುದೇ ಖಾಸಾಗಿ ಶಾಲೆಗಳಿಗೂ ಕಡಿಮೆ ಇಲ್ಲ.ನಮ್ಮ ಭವಿಷ್ಯವನ್ನು ನಮ್ಮೂರಿನಲ್ಲಿ ರೂಪಿಸಿಕೊಳ್ಳಲು ಉತ್ತಮ ಅವಕಾಶಗಳು ಇವೆ.
ಪೋಷಕರೇ ಆಲೋಚಿಸಿ:
ದೂರದ ನಗರಗಳಿಗೆ ಮಕ್ಕಳನ್ನು ಕಳುಹಿಸಿ ಆತಂಕ ಪಡುವ ಬದಲು, ನಿಮ್ಮ ಕಣ್ಣೆದುರೇ ಇರುವ, ಸುರಕ್ಷಿತ ಹಾಗೂ ಗುಣಮಟ್ಟದ ಶಿಕ್ಷಣ ನೀಡುವ ಕಳಸ ಸರ್ಕಾರಿ ಕಾಲೇಜಿಗೆ ಸೇರಿಸುವುದು ಜಾಣತನವಲ್ಲವೇ? ಇಲ್ಲಿನ ಶಿಸ್ತು, ಸಂಸ್ಕಾರ ಮತ್ತು ಉಚಿತ ಸೌಲಭ್ಯಗಳು ಮಕ್ಕಳ ಪ್ರತಿಭೆಗೆ ನೀರೆರೆಯಲಿವೆ. ಸರ್ಕಾರಿ ಶಾಲೆ-ಕಾಲೇಜುಗಳೆಂದರೆ ಕೀಳರಿಮೆ ಬೇಡ. ಕಳಸದ ಈ ವಿದ್ಯಾಮಂದಿರ ಇಂದು ಸಾಧನೆಯ ಶಿಖರದಲ್ಲಿದೆ. ಬನ್ನಿ, ನಮ್ಮೂರಿನ ಶಾಲೆಯನ್ನು ಉಳಿಸೋಣ, ಬೆಳೆಸೋಣ ಮತ್ತು ನಮ್ಮ ಮಕ್ಕಳ ಸುಂದರ ಭವಿಷ್ಯವನ್ನು ಇಲ್ಲೇ ನಿರ್ಮಿಸೋಣ.ಇದು ಕಳಸ ಲೈವ್ ಕಳಕಳಿಯೂ ಹೌದು.